Премиерот на Луксембург ги повикува членките на ЕУ да одлучат за пристапувањето на Црна Гора следната година

Премиерот на Луксембург, Лук Фриден, изјави во Европскиот парламент дека е потребен пократок и појасен временски рок за земјите кои сакаат да се приклучат кон Европската Унија и дека одлуката за пристапувањето на Црна Гора треба да се донесе следната година.

Проширувањето е прашање од стратешки интерес, рече Фриден во обраќањето пред европратениците во Стразбур вчера, предупредувајќи дека држењето на земјите кандидати „во вечна чекалница“ ризикува да ги оддалечи од Европа.

-Затоа, потребно е да се оживее надежта и да се покаже дека пристапувањето кон ЕУ е реално и блиску. Во оваа смисла, треба да поставиме појасни и поблиски рокови, рече премиерот на Луксембург, објави ЕП.

Фриден додаде дека е време да се финализираат преговорите и да се одлучи за пристапувањето на Црна Гора следната година.

Порталот „Луксембург тајмс“ пишува дека неговата изјава е изненадувачка, наведувајќи дека никој толку јасно не повикал на прием на мала балканска земја во 2026 година.

-Оваа политичка посветеност на политиката на проширување, која Фриден ја гледа помалку како формална вежба, а повеќе како геополитички инструмент, веројатно е она што најјасно го разликува од неговиот претходник и сегашен министер за надворешни работи, Ксавиер Бетел, кој беше многу поскептичен во овој поглед, оценува „Луксембург тајмс“.

Фриден рече дека ЕУ треба да го преиспита процесот на донесување одлуки, а ја спомена и идејата за европски концентрични кругови, со различни степени на интеграција на земјите.

„Во светлината на сè пожестоката меѓународна конкуренција, Европа мора да ги преиспита своите процеси на донесување одлуки и да ја преиспита идејата за Европа на концентрични кругови со помала основна група земји-членки“, рече премиерот.

Фриден во своето обраќање пред европските парламентарци рече дека Европа мора да се посвети на своите фундаментални вредности на слободата, демократијата и владеењето на правото, оценувајќи дека меѓународниот поредок на правила, договори и институции денес е под притисок како никогаш досега.

„Но, Европа не може да го напушти меѓународното право и системот заснован на правила. Ние мора да останеме гласот на овие вредности“, рече Фриден.

Тој ги поздрави предлозите на Европската комисија за зголемување на трошоците за одбрана и заедничките набавки и развој на европската индустриска база.

Според соопштението на ЕП, Фриден нагласи дека земјите-членки мора да ја користат својата индустриска разновидност за да ја одбранат Европа од оние кои ги доведуваат во прашање нејзините вредности.