Во Украина пристигна првиот странски товарен брод од почетокот на војната во февруари годинава и тој ќе биде натоварен со жито, изјави украинскиот министер за инфраструктура, Олександар Кубраков.
Украина повторно почнува да извезува жито, согласно договорот постигнат со Русија, со посредство на Турција и ОН, чија имплементација ја надгледува Заедничкиот координативен центар во Истанбул.
Кубраков рече дека товарниот брод Fulmar S, кој плови под знамето на Барбадос, се наоѓа во пристаништето во Чорноморск.
„Правиме се што е можно за да се осигураме дека нашите пристаништа можат да примаат и обработуваат повеќе бродови. Прво, планираме да достигнеме ниво од најмалку три до пет бродови дневно за две недели. Украина планира да извезува три милиони тони жито месечно од пристаништата на Црното Море“ – напиша тој на Фејсбук.
Околу 20 милиони тони жито од лани се уште се блокирани во земјата.