Кабинетот на израелскиот премиер Бенјамин Нетанјаху објави дека „постигнал договор за ослободување на заложниците“ кои се држат во Појасот Газа, додавајќи дека подоцна денеска е закажан состанок на кабинетот за безбедност.
„Преговарачкиот тим го информираше премиерот Бенјамин Нетанјаху дека се постигнати договори за ослободување на заложниците“, се вели во соопштението на неговиот кабинет.
Во четвртокот, Кабинетот на Нетанјаху го обвини Хамас дека се откажал од клучните точки од договорот за да извлече отстапки во последен момент, тврдење кое Хамас го негираше.
„Премиерот нареди политичкиот и безбедносниот кабинет да се состанат (во петок). Владата потоа ќе се состане за да го одобри договорот“, соопшти кабинетот на Нетанјаху.
Се додава дека се известени семејствата на заложниците и се прават подготовки за пречек.
Доколку биде одобрен од израелската влада, договорот за прекин на огнот ќе започне во недела и ќе вклучува размена на израелски заложници за палестински затвореници. Условите за траен прекин на борбите ќе бидат финализирани во подоцнежна фаза.
Договорот беше објавен во средата од посредниците Катар и САД.