САД ги повикаа своите граѓани веднаш да ја напуштат Русија поради војната во Украина и ризикот од, како што велат, произволни апсења или малтретирање од страна на руските агенции за спроведување на законот.
Американската амбасада во Москва соопшти дека американските државјани кои престојуваат или патуваат во Русија треба веднаш да ја напуштат земјата поради ризикот од незаконско притворање.
Амбасадата соопшти дека руските безбедносни служби апсат американски државјани под лажни обвиненија и им негираат фер и транспарентен третман, како и ги осудуваат во тајни судски процеси, вклучително и американски државјани вклучени во верски активности.
Русија покрена кривична постапка против американски државјанин поради сомнение за шпионажа, објави руската Федерална служба за безбедност (ФСБ) во јануари.
САД постојано ги предупредуваа своите граѓани да ја напуштат Русија, потсетува Ројтерс, истакнувајќи дека последното такво јавно предупредување беше во септември, откако рускиот претседател Владимир Путин нареди делумна мобилизација.