Повик за донација на книги во рамките на иницијативата „Сподели Авторка“ во „Лабораториум“

Здружението за еднакви можности „Мрежа Стела“ денеска напладне во „Лабораториум“ организира настан за донација на книги во рамките на иницијативата „Сподели Авторка“. Целта на иницијативата, која започна пред три години, е промовирање на женското литературно творештво и достапноста до феминистичката литература во јавните библиотеки.

– Но, „Сподели авторка“ е многу повеќе од ширење и поддржување на женското писмо во локалните библиотеки. Идејата е креирањето на солидарни мрежи, запознавање на младите со локалните библиотеки, имено и зачувување на истите како јавни простори. Досега имаме донирано над 3.500 книги низ цела Македонија, со фокус на помалите места и јавните простори во Делчево, Кочани, Кичево, Струга, Тетово и многу други места, велат од Здружението за еднакви можности „Мрежа Стела“.

Организаторите ги повикуваат заинтересираните, во „Лабораториум“ да донираат книга од авторка, феминистичка и еманципаторска литература, а собраните книги ќе бидат однесени во јавните библиотеки, младинските центри или училиштата низ државава.