Претседателот на Хрватската демократска заедница (ХДЗ) и актуелен премиер на Хрватска, Андреј Пленковиќ, денеска, во пресрет на 20-от конгрес на партијата, изјави дека „ХДЗ победува на парламентарните избори, без оглед на најавата“ на претседателот на Републиката, Зоран Милановиќ, дека на изборите ќе настапи на листата на Социјалдемократската партија (СДП).
На новинарско прашање, во пресрет на митингот на ХДЗ во салата „Лисински“, дали Милановиќ со својата објава си ги замрси сметките, Пленковиќ одговори: „Ние победуваме, а останатото ќе го слушнете“.
Уставниот суд најави дека утре ќе се произнесе по објавувањето на Милановиќ за кандидатура, а Пленковиќ на новинарско прашање каква одлука очекува, одговори: „Не знам, ним зависи“, пренесе агенцијата Хина.
Хрватскиот Сабор се распушти на 14 март, хрватскиот претседател Зоран Милановиќ најави дека парламентарните избори ќе се одржат во среда на 17 април, а потоа ја објави својата кандидатура на листата на СДП.
„Нечуено е претседателот на Републиката, кој е непартиски, особено во овој момент кога го распуштивте Собранието, да објави дека ќе биде кандидат на изборите и дека оди во изборна трка. е нечуено. И мислам дека не е, од уставно-правна гледна точка, редовно, но за тоа ќе одлучува Уставниот суд“, изјави за новинарите потпретседателот на ХДЗ, Олег Бутковиќ.