Петнаесет земји апелираат на признавање на државата Палестина

Петнаесет западни земји апелираат до други земји да ја изразат својата подготвеност да ја признаат палестинската држава, изјави францускиот министер за надворешни работи Жан-Ноел Баро.

-Франција и 14 други западни земји – Канада, Австралија, Финска, Исланд, Ирска, Луксембург, Малта, Нов Зеланд, Норвешка, Португалија, Сан Марино, Словенија, Шпанија и Андора – заеднички ја изразуваат својата волја да ја признаат палестинската држава и ги покануваат сите оние кои сè уште не го сториле тоа да им се придружат, рече Баро.

Апелот беше упатен во Њујорк, каде што заврши министерска конференција организирана од Обединетите нации и посветена на решение за израелско-палестинскиот конфликт со две држави.

Девет од земјите кои сега се придружија на општиот повик сè уште не ја признале палестинската држава: Андора, Австралија, Канада, Финска, Луксембург, Малта, Нов Зеланд, Португалија и Сан Марино. Тие ја изразија својата желба или се свесни за позитивниот став на нивните влади да признаат палестинска држава.

Британскиот премиер Кир Стармер вчера објави дека Обединетото Кралство ќе ја признае Палестина доколку Израел не преземе одредени мерки.

Минатиот четврток, францускиот претседател Емануел Макрон објави дека неговата земја официјално ќе ја признае палестинската држава за време на Генералното собрание на ОН во септември.

За време на конференцијата одржана во Њујорк, неколку арапски земји, вклучувајќи ги Саудиска Арабија, Катар и Египет, го повикаа Хамас да го предаде своето оружје на Палестинската самоуправа.