Од утре до крајот на декември во Србија ќе се спроведе истражување за здравјето на населението во државата

Институтот за јавно здравје на Србија „Д-р Милан Јовановиќ Батут“ денеска објави дека од 1 октомври до 30 декември ќе спроведе истражување за здравјето на населението на Србија во 2025 година.
Носител на истражувањето е Републичкиот завод за статистика на Србија, во соработка со Институтот за јавно здравје на Србија „Д-р Милан Јовановиќ Батут“ и Министерството за здравство.

Анкетата за здравјето на населението на Србија е национално истражување што се спроведува во согласност со стандардите на Европската унија (Европско истражување за здравство – EHIS), на секои шест години.

Главната цел е да се обезбеди континуитет и споредливост на податоците со претходните циклуси, како и да се добие сеопфатен опис на здравствената состојба на населението на возраст од 15 години и повеќе.

Истражувањето вклучува 4.800 случајно избрани домаќинства, а резултатите ќе бидат прикажани и на ниво на Србија и по статистички региони: Војводина, Белград, Шумадија и Западна Србија, Јужна и Источна Србија.

Истражувањето собира информации за тоа како граѓаните го проценуваат своето здравје, до кој степен користат здравствена заштита и како се грижат за сопственото здравје преку усвојување на одредени животни стилови.

Добиените резултати ќе се користат за планирање на здравствената заштита, проценка на ширењето на разни болести и идентификација на причините за нивно појавување, со цел подобрување на јавното здравје во Србија, се вели во соопштението.