Од нашиот труд е вашиот луксуз – на чекор сме до генерален штрајк во цела држава, порачаа работниците

– Непочитувани пратеници, денеска дојдовме тука да побараме да се зголеми минималната плата на 500 евра, вашите за 70% зголемени плати не ги заслужувате, истакна денеска пред Собранието претседателот на ССМ, Слободан Трендафилов.

Работниците едногласно пред Собранието донесоа одлука пратениците да си ги намалат луксузните плати на минимална плата, додека не ја зголемат минималната плата за работниците.

– Денеска е последниот ден кога ќе кажам почитувани работодавачи, а не газди, денеска сме тука пред Вас да Ви подадеме рака, да ги зголемите платите на работниците за да останеме тука, да не бидете причина за егзодус на македонските работници, порача Слободан Трендафилов пред Стопанската комора.

Збор земаа и други синдикалци кои порачаа дека платите мора да се зголемат. Секоја година по 10.000 млади работници се иселуваат од Македонија, истакнаа синдикалците, кои рекоа дека Синдикатот нема да престане да бара подобри права за работниците.

Работниците упатија апел и до Владата.

– Тргнавме 300 од пред работничкиот дом, дојдовме 1080 пред Влада, толку колку што се функционери. Намалете си ги вашите плати, да почувствувате макар и една година колку им е тешко на работниците. Запрете ги нападите врз Синдикатите, на таков начин не се води демократија.

Не може да се одлучува за нас, а без нас. ССМ пред две години организираше генерален штрајк во јавниот сектор, на чекор сме до генерален штрајк во целата држава. Прво сме 300, ќе дојдеме и 3.000, ќе дојдеме и 30.000. Бараме да не се однесувате кон работникот како кон трета класа, не ве биравме да водите кооперација, ве биравме да водите држава. Не ги заслужувате тие 79% покачена плата, истакна Трендафилов пред Владата.

Членови на синдикатот се обратија до Владата и истакнаа дека ова е првата Влада која реши 129.000 вработени во јавен сектор кои зависат од минимална плата да ги остави да ги изедат газдите од приватниот сектор, дека оваа Влада смислено ја руши репрезентативноста на Синдикатот.

– Ве чекаме да не викнете, ако не сами ќе си дојдеме, порачаа синдикалците.

– Јас повторно нудам, Слободан и Христијан на 500 евра плата, побара претседателот Трендафилов од пред Владата.