Од март идната година ќе нема плата под 22.500 денари

Идната година минималната плата ќе биде 22.500 денари, а просечната 39.500 денари.

За ова информира министерот за економија, Крешник Бектеши, кој износите ги објави на својот „Фејсбук“ профил и напиша: „Од март нема да има плата помала од 22.500 денари“.

Претходно и министерката за труд и социјална политика, Јованка Тренчевска, во „Топ тема“ изјави дека ниту во приватниот, ниту во јавниот сектор не може да има плата под законски утврдениот износ за минимална плата. Односно, сите месечни примања ќе се израмнат со минималецот.

„Со тоа се заштитуваат вработените дека плата исплатена под минимална плата не може да има никој. Тој што имал 22.000 денари, а минималната плата е 23.000, ќе му се усогласи со минималната плата. И сега ако некој зема помала плата од минималната, треба да се пријави на државниот Инспекторат за труд за да може рабодавачот да биде санкциониран и да му се зголеми платата“, посочи Тренчевска.

Инаку, на почетокот – во 2012, минималната плата беше 8.050 денари, а во 2017 се утврди прагот од 12 илјади денари.

Всушност, во целиот период има извесни поместувања, а конечното решение за одредување на износот датира од март минатата година.