Нови докази дека Русија, Кина и Иран спремаат раскол и конфузија во САД пред и по изборите

Противници на САД веќе ги засилуваат обидите за создавање раскол и недоверба во американското општество пред и по претседателски избори, се дознава од најновата декласифициран проценка на Управата на директорот на националното разузнавање (ДНИ).

Во неа се прецизира дека некои држави, по сè изгледа, можат да преземат дополнителни мерки за предизвикување насилство поврзано со изборите.

Разузнавачката проценка доаѓа на само две недели пред американските избирачи да одат на гласачките места за избор на нов претседател и да гласаат за низа државни и локални служби.

-Странски субјекти – особено Русија, Иран и Кина – сè уште бараат начини да ги продлабочат поделбите, да ги разединат Американците и да ја поткопаат довербата во демократскиот систем на САД, што одговара на нивните интереси, се вели во документот.

Документот дополнително нагласува дека разузнавачките служби „сè повеќе се уверени“ дека Русија презема чекори „за поттикнување насилство“. Исто така, Иран „може да се обиде да предизвика насилство“.

Проблеми можат да се појават по крајот на гласањето. Особена загриженост предизвикува тоа што, очигледно, сè поголемо внимание се насочува кон периодот по затворањето на гласачките места, кога државните и локалните службеници ќе ги бројат гласовите и ќе ги потврдуваат резултатите.

Противниците на САД „веројатно ќе создадат лажни приказни или ќе ја засилат содржината што, според нив, ќе создаде конфузија околу изборите, како на пример, објавување лажни изјави за изборни нерегуларности“, изјави претходно службеник на американската разузнавачка служба кој ги брифираше новинарите засновано на анонимност за да дискутира подетално за разузнавачката проценка на овие закани.

Според службеното лице, Русија, Иран и Кина, „откривајќи прозорец на ранливост, ќе почнат да промовираат дезинформации или да поттикнуваат и засилуваат протести и закани“, почнувајќи од моментот на затворање на гласачките места па сè до 6 јануари, кога резултатите од претседателските избори ќе бидат потврдени на заедничката седница на Конгресот.

Според разузнавачите, Русија работи на зголемување на шансите за избор на поранешниот претседател и сегашен републикански кандидат Доналд Трамп, додека Иран се обидува да го спречи неговиот реизбор и наместо тоа ја поддржува кампањата на потпретседателката Камала Харис, кандидатка за претседател од Демократската партија.

Претставниците на американската разузнавачка заедница истакнуваат дека Кина досега не се вмешала во претседателската трка, фокусирајќи ги своите напори на кандидатите за во Конгресот, како и на државните и локалните власти кои, според нив, промовираат политики што се штетни за интересите на Пекинг, вклучувајќи ги и оние кои изразуваат поддршка за Тајван.