Недостигаат околу 40 инспектори за секоја општина да може да постапува соодветно

За исполнување на минималните услови за секоја општина да може да постапува соодветно потребно е да се вработат уште околу 40 инспектори низ општините, изјави денеска претседателот на ЗЕЛС, Орце Ѓорѓиевски. Контроли, нагласи Ѓорѓиевски, мора да се направат секаде и тука сите општини ќе си помогнат меѓусебно, а во наредниот период, како што рече, ќе се потрудат во секоја општина да биде вработен соодветен инспектор.

Оваа состојба не е нова, рече Ѓорѓиевски, посочувајќи дека општините и досега меѓусебно соработувале во однос на инспекциските служби.

-Јас кога станав градоначалник во општината немаше практично никаков инспектор, ниту градежен, ниту за домување. Било каква инспекција не функционираше во нашата општина, дали тоа било од објективни или субјективни причини не навлегувам, но првата меѓуопштинска соработка ја направив со општина Ѓорче Петров, а сега сме општина која што помага со инспекции во другите општини, изјави Ѓорѓиевски.

Во однос на проверките на станбените објекти, Ѓорѓиевски, рече дека најчесто постарите згради имаат проблеми со хидрантската мрежа, но дека не се решава ништо преку ноќ и мора од некаде да почнеме.

-Најчесто дека не поседуваат доволно опрема, односно не поседуваат црева во хидрантите. Наложено е од нашите служби, во соработка со ДЗС во многу скоро време да се постапи. Одиме на тоа да дадеме простор да се поправата сите грешки од минатото, пред да се премине на казнување. Најлесно е да изречете казна, потешко е да го промените системот и да воспоставите систем како што граѓаните заслужуваат повеќе од триесет години, изјави Ѓорѓиевски.

Секоја општина, според Ѓорѓиевски, ќе треба да достави записници од извршените контроли до ЗЕЛС и тие потоа ќе може да бидат дадени на увид на јавноста.