Најмалку пет американски војници се повредени во напад врз воена база во Ирак во понеделникот, изјавија тројца американски претставници за Ројтерс, додека загриженоста во регионот расте по минатонеделното убиство на високи членови на групите Хамас и Хезболах.
Официјалните лица, кои сакаа да останат анонимни, рекоа дека наводниот ракетен напад се случил во воздухопловната база Ал Асад во Ирак. Тие се повикаа на првичните информации за кои рекоа дека може да се променат.
„Персоналот на базата ја проценува штетата по нападот“, додаде еден од официјалните лица.
Две ракети од типот Каќуша беа истрелани во понеделникот врз база во западен Ирак, соопштија безбедносни извори. Еден безбедносен извор рече дека ракетите паднале во базата.
Минатата недела, САД започнаа напад во Ирак, насочен кон лица за кои американските официјални лица рекоа дека се милитанти кои се подготвуваат да лансираат беспилотни летала и претставуваат закана за американските и коалициските сили.
САД се подготвуваат да возвратат на Иран по атентатот на лидерот на Хамас – Исмаил Ханије во Техеран. Не е јасно дали нападот е поврзан со заканите на Иран дека ќе се одмазди за убиствата.
Американските трупи, кои беа присутни во Ирак повеќе од 20 години по инвазијата, беа цел на слични напади на вооружени групи поврзани со Иран од октомври минатата година. Американската војска во Сирија неколку пати беше цел на слични напади.
Пентагон соопшти дека ќе распореди дополнителни борбени авиони и поморски воени бродови на Блискиот Исток додека Вашингтон се обидува да ја зајакне одбраната по заканите од Иран и неговите сојузници Хамас и Хезболах.