Над 2.000 жртви, 300 исчезнати и 4.000 повредени по земјотресот во Мјанмар

Владејачката воена хунта во Мјанмар денеска прогласи еднонеделна жалост по силниот земјотрес што го погоди регионот, при што загинаа повеќе од 2.000 луѓе, речиси 300 се водат како исчезнати, а скоро 4.000 беа повредени.

Минутата молчење ќе започне во 12:51 часот по локално време, точно кога се случи земјотресот во петокот, јавува Би-Би-Си.

Помошта стаса во Мјанмар од целиот свет, вклучително и тимови од Русија, Кина и САД, но спасувачките групи предупредуваат на појава на болести, додека лошата инфраструктура и мноштвото граѓански конфликти сериозно ги попречуваат напорите за помош.

Бројот на жртвите во Тајланд е 20, додека се претпоставува дека околу 70 луѓе се заглавени под урнатините во Бангкок.

По извештаите за вибрации и пукнатини три дена по силниот земјотрес што го погоди Мјанмар и се почувствува во околните земји, во некои објекти во Бангкок е извршена превентивна евакуација на неколку згради, објавија денеска локалните медиуми.

Станува збор главно за административни и деловни згради.