Моше Саад од партијата на Нетнајху: Воздушните пакети со хуманитарна помош во Газа содржат муниција

Пратеникот Моше Саад од партијата Ликуд на израелскиот премиер Бенјамин Нетанјаху изјави дека воздушните пакети на хуманитарна помош во Газа, извршени од странски земји, содржат пратки оружје, објави „Тајмс оф Израел“.

-Хуманитарната помош го вооружува и финансира Хамас, изјави Саад за јавниот радиодифузер Кан во радио интервју. „Дали некој ги проверил овие воздушни пакети? На сите им е јасно дека содржат муниција“.

Тој додаде дека Израел мора да го окупира целиот Појас Газа бидејќи „тоа е единствениот начин да се добие војна“.

Саад е познат по своите екстремно десничарски ставови и постојано отворено се залага за „целосно гладување на Газа“ и воведување максимална опсада, со порака дека дел од населението треба да биде протерано во други земји, а преостанатите Палестинци сместени во хуманитарни зони под израелска контрола.

Тој, исто така, јавно изјави дека испораките на хуманитарна помош всушност го вооружуваат и финансираат Хамас.

-Испраќањето храна до Хамас е исто како испраќање муниција, рече тој во еден од своите говори, додавајќи дека таквата помош го зајакнува непријателот, го продолжува конфликтот и во исто време ги става израелските војници во дополнителна опасност. Според него, морално е неприфатливо истовремено да се води војна против Хамас и во исто време да им се обезбедат ресурси што, тврди тој, можат да се користат за воени цели.

Саад, исто така, предложи контроверзно законодавство што би го ставило одделот за полициски истраги под поголема судска контрола, што предизвика критики за можно политичко влијание врз правните процеси.

Од 26 јули, кога Израел усвои нова политика со која се дозволува повеќе помош да влезе во Газа, повеќе од 1.000 пакети помош се фрлени од воздух во Појасот Газа од најмалку 12 земји, вклучувајќи го и Израел, според војската. Пакетите фрлени од ИДФ беа обезбедени од меѓународни хуманитарни организации.

Израел повторно ја воведе политиката поради растечките меѓународни критики за кризата со глад во Газа. Но, воздушните пакети можат да достават само мал дел од количините што можат да се достават по копно. Тие исто така претставуваат ризик по безбедноста на цивилите кои можат да бидат повредени од пакетите што паѓаат од висина.