ММФ го отстрани Косово од листата на конфликтни зони

По Светска банка, и Меѓународниот монетарен фонд (ММФ), исто така, го отстрани Косово од листата на области во состојба на кревкост и конфликт, соопшти Централната банка на Косово (ЦБК).

– ЦБК изразува длабока благодарност до ММФ за ова важно признание на институционалниот напредок и макрофинансиската стабилност на Косово, се наведува во соопштението.

И Светска банка пред неколку дена го презеде истиот чекор. Отстранувањето на Косово од таа листа, ЦБК го оцени како значаен момент, „кој го одразува континуираниот напредок на Косово во зајакнувањето на институционалната и макроекономската стабилност, финансиското управување и владеењето на правото“.

ЦБК наведе неколку клучни придобивки кои се очекуваат за Косово по таа одлука, истакнувајќи го подобрувањето на меѓународната перцепција за институционалната и економската стабилност, како и зголемувањето на довербата на инвеститорите и намалувањето на проценките на финансискиот ризик.