Во ноќта меѓу понеделникот и вторникот се уапсени 72 лица, јавува БФМ ТВ. Францускиот претседател Емануел Макрон е внимателен во врска со понатамошниот развој на настаните.
„Мислам дека тоа не е зад нас. Ќе видиме што ќе се случи на 13 и 14 јули и во следните месеци“, рече Макрон.
Тој во понеделникот вечерта ја посети касарната Бесиер во 17-тиот арондисман во Париз, каде се стационирани припадници на интервентната полиција. Во објава на Твитер, Макрон им се заблагодари на полицијата, жандармите и пожарникарите за нивната извонредна мобилизација во последните ноќи.
Во текот на денот, Макрон ќе се сретне со градоначалниците на околу 220 општини каде што избувнаа немири во претходните денови, а Елисејската палата објави дека претседателот „сака да започне долгорочна работа за разбирање на причините што довеле до овие настани“.
Од почетокот на нередите по смртта на тинејџерот на 27 јуни, уапсени се 3.490 лица, соопштија денеска од МВР за ТВ БФМ.
Според податоците на МВР, од почетокот на немирите опожарени се близу 5.900 возила, близу 1.100 објекти се изгорени или оштетени, а евидентирани се близу 270 напади на полициски станици или жандармерија.
Многу Французи се солидаризираат со градските администрации кои беа цел на насилство
Голем број луѓе се собраа во градските администрации низ Франција за да покажат солидарност со локалните власти кои беа цел на шест ноќи насилства предизвикани од полициското убиство на 17-годишно момче од алжирско и мароканско потекло во предградие на Париз.
Немирите, кои стивнаа во неделата вечерта, во голема мера беа поттикнати од реакцијата на тинејџерите во приградските и урбаните станбени населби против француската држава, која многу млади имигранти велат дека систематски ги дискриминира, објави АП.
Вкупно 99 градски управи биле нападнати за време на насилните нереди, соопшти МВР, додавајќи дека викендов е евидентиран обид за напад врз дом на градоначалник со автомобил полн со експлозив.
Во јужните предградија на Париз, стотици луѓе се собраа да му дадат поддршка на градоначалникот Винсент Жанбрин, чија сопруга и едно од неговите мали деца беа повредени кога автомобил полн со експлозив удри во неговата куќа рано наутро во неделата, додека тој и другите жители сè уште спиеја.
Тоа беше личен напад за кој властите рекоа дека ќе биде кривично гонет како обид за убиство и тоа предизвика излив на поддршка за локалните власти во многу градови каде градската власт често е централна во јавниот живот.
„Го видовме вистинското лице на бунтовниците, лицето на убијците“, рече Жанбрен.
Тој изјави дека Франција и самата демократија биле нападнати во деновите на немири.
Покрај минатонеделниот марш за Нахел, 17-годишник со алжирско-мароканско потекло, кој во вторникот беше убиен од полицијата во париското предградие Нантер, се вели дека имало гнев кај младите кон полицијата, со двете страни користејќи сè поагресивни методи.
Министерството за внатрешни работи соопшти дека просечната возраст на 3.354 уапсени во текот на изминатата недела била 17 години.
Немирите во Париз предизвикаа штета од 20 милиони евра на транспортниот систем
Шестдневните немири по полициското убиство на тинејџер од алжирско и мароканско потекло во париското предградие Нантер предизвикаа штета од околу 20 милиони евра на јавниот превоз во парискиот регион, соопштија локалните власти.
Како што се наведува, тука спаѓаат „запалени автобуси, запален трамвај, два оштетени трамваи и уништена урбана инфраструктура“, пренесува „Паризиен“.
Француската премиерка Елизабет Бурн најави дека безбедносните мерки воведени минатата недела ќе бидат задржани во текот на ноќта, и покрај смирувањето на тензиите.
Таа додаде дека 45.000 распоредени припадници на полицијата и жандармеријата засега ќе останат на своите места.