Министерство за туризам на Грција: Посетителите со кампери и приколки можат да се паркираат во организираните кампови

Граѓаните/посетителите со кампери можат да се паркираат во организирани кампови, односно во бизнисите кои работат законски и ги исполнуваат сите хигиенски и безбедносни стандарди за посетителите и, генерално, законските урбанистички и еколошки стандарди, со што се става крај на злоупотребувачкото окупирање на шумите, плажите, археолошките локалитети и, генерално, на просторите за јавна употреба од кампери и приколки, соопштија од Министерството за туризам на Грција, јави дописничката на МИА од Атина.

Соопштението се однесува на законот изгласан на крајот во јануари, што како што објави МИА во петокот, во Грција се актуализираше откако на Пелопонез тројца кампери добиле казната од 300 евра за непрописно паркирање на бесплатен јавен општински паркинг на кој, според медиумите, немало никаква ознака со која се забранува паркирање на кампери во оваа област.

Со законот е забрането поставување шатори и паркирање приколки, полуприколки и кампери на археолошки локалитети, крајбрежни делови, плажи, на рабови на јавни шуми и општо на јавни површини, а за прекршувањето предвидена е казна затвор до три месеци или парична казна од 300 евра по лице или по шатор или по превозно средство.

Од Министерството за туризам, по рекациите во земјата, преку соопштението детално објаснуваат „што навистина предвидува Законот 5170/2025 за кампер возилата/приколките“, истакнувајќи дека конкретната одредба „го озакони очигледното“ и дека се применува она што важи во сите земји, кои ги почитуваат законите, „кои ги штитат јавните добра, хигиената и безбедноста на сите граѓани и посетители, а во исто време јасно забрануваат злоупотреба на јавниот простор на штета на природната и културната средина“.

– Со други зборови, ние го штитиме јавниот интерес и ја штитиме законитоста!, истакнаа од Министерството за туризам на Грција.

Објаснија дека паркирањето на кампер возилата и приколките е регулирано со Законот за безбедност во сообраќајот според кој во населени места, паркирањето на приколки, каравани и чамци е забрането повеќе од 24 последователни часа и дека „можат да се паркираат во соодветни оградени области одредени од надлежните општини или заедници.“

Дополнително посочија дека на приватните имоти, законот предвидува бесплатно паркирање на само еден кампер или приколка, а за дополнително користење на просторот потребно е „создавање бизнис“.

– На овој начин, се поставува бариера за нелегалната активност на сметка на легалните и лиценцирани кампови, соопштија од Министерството за туризам на Грција.

За конкретниот закон и казнетите кампери минатиот викенд, како што завчера објави МИА реагираа од Грчкиот клуб на кампери, со оглед на тоа што казнетите се нивни членови, а Управниот одбор одлучил во соработка со правниот застапник да изготват писмо до надлежните министри за туризам и транспорт со барање за дополнително појаснување на спорниот член 27 од законот и прашањето да го покренат и во Парламентот.