Хрватскиот претседател Зоран Милановиќ при посетата на претседателката на Косово Вјоса Османи на Загреб, изјави дека Косово е оставено на себе и дека земјата ја загубила поддршката од сојузниците, пренесува Индекс.хр.
Милановиќ за Османи рече дека таа е лидер на „пријателска земја, која имаше слична, но не иста судбина како Хрватите“.
По тој повод Милановиќ се присети и на текот на војната во СФРЈ.
– Имавме тежок почеток, нè бранеа неколку добри луѓе и на почетокот немавме помош. Сите тие сојузници и пријатели седеа со скрстени раце. Косово започна поинаку, со многу поддршка која во меѓувреме беше изгубена и исчезна – изјави хрватскиот претседател, пренесува Косово онлајн.
Тој потоа објасни зошто верува дека ситуацијата за Косово толку многу се сменила.
„Сега се оставени сами на себе, пет членки на ЕУ и НАТО не ги признаа, затоа Османи е денеска овде како моја гостинка и затоа ова е заедно со нашите прослави и нашите денови на гордост и слава. Во исто време е и почит и признание за нашата пријателска земја – рече Милановиќ.