Милановиќ изрази загриженост околу можен израелски напад врз Иран

Претседателот на Хрватска Зоран Милановиќ ја коментираше актуелната геополитичка ситуација, нагласувајќи дека евентуалниот израелски напад врз Иран може да има сериозни последици по светскиот мир и економијата, како и врз цената на нафтата, и да влијае на Западен Балкан.

– Се соочуваме со настани кои можат да имаат непроценливо влијание врз светскиот мир, поредок и глобалната економија, доколку израелската влада одлучи да го нападне Иран во следните две недели. Знаејќи ги нивните методи на работа и дејствување, тие би можеле да го направат тоа една недела пред американските избори и на тој начин да се обидат да го вовлечат светот во нов циклус на војна и да ни ја подигнат цената на нафтата на 300 долари. Тоа не се нереални работи, ова се случува пред наши очи – изјави Зоран Милановиќ.

„Денес тоа се смета за русофобија или путинизам“

– Војната во Украина, за жал, е при крај и, за жал, на единствениот начин на кој можеше да заврши, за што многу луѓе зборуваат две и пол години, но претпоставувам дека тоа денес се смета за русофобија или путинизам. Тоа е слепило, тоа е многу несериозно и опасно однесување – рече тој и испрати јасна порака: „Јас ќе ја чувам Хрватска од вакви конфликти и каде што не ни е местото и каде што не треба, нема да бидеме“.

Во Тиват, по самитот Брдо Бриони, одговарајќи на новинарски прашања, зборуваше и за распоредувањето на хрватските сили во Украина и повтори дека додека е претседател на Хрватска, нема да потпише присуство на хрватски војници во Украина.

Милановиќ е на мислење дека војната во Украина од првиот ден отиде во катастрофална насока, за што, како што рече, сите сме виновни и повтори дека НАТО влегува во воениот конфликт во Украина со својата нова активност на НСАТУ мисија.

– Од првиот ден војната отиде во несакана и катастрофална насока за Украина. Половина милион мажи се убиени и осакатени и сега што треба? Да бидат убиени или осакатени уште 50.000? Дали ќе биде доволно за да се задоволат апетитите? Вашингтон, Москва, дали е тоа доволно? – праша Милановиќ, осврнувајќи се на најновата активност на НАТО за безбедносна помош и обука на Украина (НСАТУ), за која веќе кажа и претходно, значи влегување во војна.

Тој им порача на „оние кои сакаат војна“ да ги испратат своите деца таму, додека смета дека конфликтот треба да се реши по дипломатски пат и дека „нема да заврши добро за оние кои го водеа од западната страна“.

Премиерот Андреј Пленковиќ реагираше на одлуката на Милановиќ да не го потпише одобрението за заминување на хрватските војници во Украина, велејќи дека го интересира каков договор има Милановиќ со рускиот претседател Владимир Путин.

Сè во врска со Милановиќ ми изгледа загрижувачки, изјави Пленковиќ и додаде дека претседателот на Хрватска „глуми“.

– Се прашувам каков договор има Милановиќ со Владимир Путин. Затоа жалам за наметливото однесување на членовите на СДП. Претпоставувам дека тоа го прават на бранот анкети кои, за мене изненадувачки, се проруски ориентирани. Еве, сега кога го имаат Роберт Храње, нека одржи мал семинар за тоа што е НАТО и што се случува во Украина – рече Пленковиќ.

Извор: Блиц, Вечерњи лист