Мерц избран за канцелар на Германија

Фридрих Мерц е нов канцелар на Германија откако на второто гласање во Бундестагот го доби потребното мнозинство.

Новиот состав на германскиот Бундестаг го одржа своето второ гласање, на кое со мнозинство гласови го избра Фридрих Мерц (CDU) за нов канцелар на Германија.

Првиот круг гласање, кој се одржа наутро беше шок за ЦДУ и СПД, бидејќи не успеаја да обезбедат минимум 316 гласови за назначување на Мерц. Во вториот круг од гласањето, новото мнозинство успеа во овој потфат, а Мерц доби 325 гласови. Иако се очекуваше партиите да направат пауза од неколку дена пред новото гласање, претставниците на ЦДУ и СПД ја добија поддршката од Левицата и Зелените за вториот круг од гласањето.

Новоизбраниот канцелар Мерц ќе ја добие потврдата за назначувањето од сојузниот претседател Франк-Валтер Штајнмаер во палатата Белви. Како што е планирано, Мерц ќе ја положи заклетвата во Бундестагот, а медиумите објавија и дел од текстот на церемонијата што ќе го придружува целиот настан.

„Се колнам дека ќе ги посветам своите сили на благосостојбата на германскиот народ, ќе ги зголемам неговите придобивки, ќе спречам штета, ќе го почитувам и бранам Уставот и законите на сојузната држава, совесно ќе ги исполнувам моите должности и ќе спроведувам правда за сите. Нека ми помогне Бог“, е дел од заклетвата.

По положувањето на заклетвата, Мерц повторно ќе се сретне со германскиот претседател, како и со министрите во новата влада кои ќе добијат потврда за нивното назначување. После тоа, министрите повторно ќе се вратат во Бундестагот каде што ќе положат заклетва.

ЦДУ и СПД, кои ќе ја формираат новата влада, веќе се договорија за распределбата на позициите и имињата што ќе ги преземат позициите. Секако најинтересниот факт е дека ЦДУ ќе го преземе управувањето со Министерството за надворешни работи по неколку децении. Шеф на дипломатијата ќе биде Јохан Вадефул, а министер за Европа ќе биде Гинтер Крихбаум.

Од друга страна, СПД ќе има седум позиции во новата влада, а најзначајно е секако дека Борис Писториус ќе остане министер за одбрана.

Кој е Фридрих Мерц

69-годишниот Мерц ја презеде функцијата од Олаф Шолц. Конзервативниот лидер вети дека ќе даде приоритет на европското единство и безбедноста на континентот, соочен со новата администрација на американскиот претседател Доналд Трамп и војната во Украина.

Двопартискиот блок ЦДУ/ЦСУ на Мерц стана најголемата сила на изборите во Германија на 23 февруари. Потоа тој се обрати кон социјалдемократите, левоцентристичката партија на Шолц, за да формира коалиција со парламентарно мнозинство.

Мерц веќе промовираше планови за повисоки трошоци за одбрана и се соочи со уште поголем притисок да го оствари тоа, откако големите тарифи објавени од американскиот претседател Доналд Трамп предизвикаа значителни нарушувања на пазарот. Како канцелар, тој ќе треба да го надомести лидерскиот вакуум и да обезбеди координиран европски одговор на најновите американски политики, кои ја зголемија напнатоста во трансатлантските односи.

Лидерот на конзервативците имаше потреба од мнозинство од 316 од вкупно 630 гласови во парламентот, но доби само 310 во првиот круг. Бидејќи гласањето беше тајно, засега не е јасно кој го напуштил таборот на Мерц. Во вториот круг тој доби 325 гласови.

Мерц е дипломиран правник, чие издигнување беше спречено од поранешната канцеларка Ангела Меркел во раните 2000-ти. Тој дури се откажа од активната политика на неколку години и, иако има политичко искуство, ја презема канцеларската функција без претходно да бил во владата.

Меркел го опиша Мерц како брилијантен говорник и ја пофали неговата желба за лидерство, иако призна дека тоа било проблем во нивните односи. „Имаше еден проблем уште од почетокот: обајцата сакавме да бидеме шефови“, напиша таа во својата мемоарска книга „Слобода“.

Откако го напушти парламентот во 2009 година, Мерц се повлече од активната политика на неколку години. Во тоа време практикуваше право и беше претседател на надзорниот одбор на германскиот огранок на инвестициската компанија „БлекРок“. Често патуваше по работа во САД и Кина, иако никогаш не живеел надвор од Германија.

Фолкер Резинг, кој неодамна напиша биографија насловена „Фридрих Мерц: патот кон власта“, вели дека Мерц најверојатно ќе биде „најмеѓународниот канцелар“ на Германија од 1945 година наваму.

Мерц го започна своето политичко враќање откако Меркел се повлече од лидерската позиција во ЦДУ во 2018 година и објави дека нема да се кандидира за петти мандат како канцелар. На почетокот не успеа, но на крајот беше избран за лидер на партијата по поразот на десноцентристите од Олаф Шолц на изборите во Германија во 2021 година.

Според Резинг, Мерц не верува во избегнување на конфронтацијата по секоја цена, туку смета дека „одредена доза провокација може да иницира вистинска дебата“.

За време на изборната кампања, Мерц вети дека ќе ја зајакне заостанатата германска економија и ќе ја ограничи нелегалната миграција. Откако Трамп се врати во Белата куќа и напнатоста околу решавањето на војната во Украина се зголеми, Мерц, кој долго време поддржува силни трансатлантски односи, изјави по победата дека неговиот главен приоритет е да ја обедини Европа пред предизвиците што доаѓаат од САД и Русија.

Мерц го стави заострувањето на германските имиграциски закони во фокусот на својата изборна кампања, откако порано оваа година мигрант уби две лица во напад со нож во Баварија. Тој поднесе необврзувачки предлог во парламентот, повикувајќи многу повеќе мигранти да бидат враќани од границите на Германија. Предлогот беше одобрен благодарение на гласовите на крајнодесничарската партија „Алтернатива за Германија“ (АфД). Ова му донесе критики дека го прекршил табуто за несоработка со АфД, а стотици илјади Германци излегоа на улиците да протестираат против предлогот на Мерц и против подемот на крајната десница.

Како политичар, Мерц секогаш ги бранеше конзервативните вредности и ја нагласуваше важноста на семејството. За време на студиите по право, тој ја запозна својата сопруга Шарлот, која сега е судија и со која имаат три деца.

Страствен пилот, Мерц понекогаш лета со својот мал авион од домот во регионот Зауерланд до Берлин во понеделник наутро.