Мерц жестоко удри по двоецот Трамп-Маск: „Бесрамни сте како Москва!“

Украинскиот претседател Володимир Зеленски му честиташе на лидерот на конзервативната опозициска демохристијанска партија Фридрих Мерц за победата на неговата партија на германските парламентарни избори и рече дека со нетрпение очекува да работат заедно за да донесе „вистински“ мир во Украина.

„Им честитам на ЦДУ/ЦСУ и на Фридрих Мерц за нивната победа на изборите за Бундестагот“, напиша Зеленски во објавата на Х.

– Со нетрпение очекуваме да продолжиме да работиме заедно со Германија за да ги заштитиме животите, да донесеме вистински мир во Украина и да ја зајакнеме Европа – се вели во соопштението.

Кандидатот за канцелар на ЦДУ/ЦСУ, победничката партија на парламентарните избори во Германија, Фридрих Мерц, во неделата го оцени мешањето на САД во изборната кампања подеднакво проблематично како и руското мешање и се залага за што поскоро независност на Европа од САД.

– Интервенциите од Вашингтон не беа ништо помалку драматични, драстични и бесрамни од оние што ги доживеавме од Москва – рече Фридрих Мерц во разговорот меѓу партиските претставници на јавната телевизија по парламентарните избори.

Тој рече дека американскиот претседател Доналд Трамп покажал дека судбината на Европа е целосно неважна за Американците.

Мерц конкретно ја критикуваше поддршката на соработникот на Трамп, Илон Маск за десничарската популистичка Алтернатива за Германија (AfD).

Веројатниот иден канцелар на Германија изјави дека Германија е под притисок од многу страни и затоа повика на повеќе единство во Европа.

– Никогаш не верував дека некогаш ќе ги кажам овие зборови на германската телевизија, но сега апсолутен приоритет е да се постигне единство во Европа и да се зајакне Европа до степен да се осамостои од САД чекор по чекор – рече претседателот на Христијанско-демократската унија (ЦДУ).