Демонстрантите од синдикатите, организациите на граѓанското општество и левичарските партии се собраа додека полицијата распореди голем број безбедносни сили, вклучително и засилувања од други делови на Германија, пред дводневниот конгрес на „АфД“, објавува „Ројтерс“.
Полицијата проценува дека околу 15.000 луѓе учествувале во протестите во Ерфурт и околината.
„Сакаме јасно да ставиме до знаење дека едноставно нема да го толерираме ова и дека фашизмот повторно е во пораст овде во Германија“, рече Георг Бекер, портпарол на иницијативата „Отпор“ против „АфД“.
Конгресот, на кој се очекува повторно да бидат избрани копретседателките на партијата Алис Вајдел и Тина Хрупале, се одржува пред изборите во источните покраини Саксонија-Анхалт и Мекленбург-Западна Померанија, за кои АфД верува дека би можеле да го отворат патот за успех на партијата на национално ниво.
Основана пред повеќе од една деценија, „АфД“, според анкетите на јавното мислење, доби значителна предност пред конзервативниот блок на германскиот канцелар Фридрих Мерц, благодарение на комбинацијата од националистичка реторика, застапување за построги имиграциски политики и привлекување гласачи незадоволни од работата на последователните влади и години економска стагнација.
Противниците ја обвинуваат партијата за промовирање расистички политики и ставови некомпатибилни со демократските вредности на Германија и предупредуваат дека доаѓањето на партијата на власт би претставувало закана за уставниот поредок на земјата.
Традиционалните политички партии ја отфрлија можноста за соработка со „АфД“ како дел од таканаречената стратегија за „заштитен ѕид“, која има за цел политички да ја изолира партијата и да ја спречи да влезе во коалициски влади.
Според најновите анкети, поддршката за „АфД“ достигнува 29 проценти, додека конзервативниот блок ЦДУ/ЦСУ на канцеларот Мерц ужива поддршка од околу 22 проценти од гласачите.
Порано оваа година, партијата постигна значителен напредок и на регионалните избори во две западногермански покраини.
Сепак, најголемата поддршка за „АфД“ е во поранешната комунистичка Источна Германија, каде што анкетите покажуваат највисоко ниво на разочарување на гласачите од традиционалниот партиски систем.
Во Саксонија-Анхалт, каде што најновите анкети даваат поддршка на „АфД“ од 41 процент, во споредба со 23 проценти за Христијанско-демократската унија на Мерц, партијата смета на убедлива победа.
„АфД“ се надева и дека ќе стане најсилната политичка сила во Мекленбург-Западна Померанија, пренесува „Бета“.