Бојан Маричиќ – вицепремиерот задолжен за европски прашања во интервју за тв Алсат рече дека скринингот практично претставува еден начин да се мобилизира администрацијата и дека веќе се работи на финиширање на преговарачката структура со сите потребни акти и назначувања.
„Очекувам до крајот на овој месец да ја претставам, потоа во еден интензивен период до 15 септември на сите министерства, на сите институции им објасниме точно која е нивната улога во скринингот и од 15 септември натаму да започнеме со тој процес. Ќе биде многу интензивно, секое поглавје ќе трае неколку дена, зависно од тоа колку е обемно. Важно ќе биде сите со внимание да ги следиме презентациите и да учествуваме активно во нив затоа што тоа ќе биде основа за претставување или поставување на критериумите за отворање и затворање на поглавјата понатаму, кажа Маричиќ.
Вицепремиерот Маричиќ го објасни дека процесот на скрининг ќе се одвива во две фази и дека кој започнува на 15 септември и по веќе дефиниран календар се очекува да трае до ноември 2023 година.
„По завршување на овој објаснувачки скрининг, следува билатералниот скрининг, каде што се вклучени не само Европската Комисија, и ние и Албанија, туку и државите членки на ЕУ, каде што сите тие ќе изнесат и свои видувања за нашата усогласеност во сите делови, во сите кластери и поглавја. Тој процес е важен за нашата администрација бидејќи треба да ни ја даде сликата до каде сме со усогласување со европското законодавство, што уште треба да направиме, но и како во пракса да се спроведат полесно и побрзо тие правила“ – посочи Маричиќ.
На прашањето дали отворањето и затворањето на кластерите ќе биде едноставно и кои кластери се очекува да бидат најтешки, вицепремиерот Маричиќ одговори дека секое поглавје и секој кластер има своја тежина.
„Секако најзначаен со најголема тежина, поставена од самата нова методологија на преговори, е кластерот на Темелни вредности, кој прв се отвора, последен се затвора и останува отворен во текот на целите преговори. Меѓутоа има други кластери коишто не се помалку тешки и помалку важни“ – истакна Маричиќ.
Маричиќ посочи дека покрај на подготовките за скринингот, паралелно и непречено се работи на превод на европското законодавство и дека и оваа година очекува да се држи темпото од минатата година, кога беа преведени преку 17.000 страници.