Косовскиот премиер Албин Курти рече дека „силниот сојуз на Србија со Русија е вистински редовен безбедносен ризик“ со кој се соочува Косово и дека затоа е неопходен итен договор за нормализација на односите што двете страни ќе го потпишат.
Како што се наведува во соопштението на Владата, Курти на панел дискусија во Лондон, организирана од институтот Чатам Хаус, рекол дека присуството на Русија на Балканот расте преку Србија и дека потпишаниот договор ќе значи „правна сигурност и спроведување на договореното од страните“.
„Одбивањето да се потпише договорот значи и дека Србија сака да ја остави отворена опцијата за инвазија на Косово“, изјави Курти.
Тој повторно ја обвини Србија дека стои зад нападот во Бањска на 24 септември минатата година, кога вооружена група Срби ја нападна косовската полиција и го уби наредникот Африм Буњаку. Официјален Белград претходно ги негираше овие обвинувања.
Минатата година Косово и Србија го прифатија договорот за нормализација на односите на предлог на Европската Унија и анекс документот за негова имплементација. Сепак, српскиот претседател Александар Вучиќ одбива да го потпише, на што инсистира косовскиот премиер Албин Курти.
Европската Унија, која посредува во дијалогот, во неколку наврати изјави дека договорот, без разлика што не е потпишан, е правно обврзувачки за двете страни.
Инаку, договорот предвидува решавање на отворените прашања меѓу Косово и Србија. Со него официјален Белград се обврзува да не го блокира членството на Косово во меѓународните организации и да не го загрозува територијалниот интегритет на Косово.
Од друга страна, официјална Приштина се согласи да им обезбеди на Србите на Косово одредено ниво на самоуправување, односно да формираат Заедница на општини со српско мнозинство.