Премиерот на Косово, Албин Курти, во пресрет на Самитот на Берлинскиот процес, што се одржува во Тирана, изјави дека дијалогот со Србија не може да продолжи како ништо да не се случило.
– Следното поглавје од дијалогот за нормализација мора да ги земе предвид агресивните дејствија на Србија преку терористичкиот напад на 24 септември, за што има доволно докази и факти за вмешаност на Србија – изјави Курти, беше соопштено од владата на Косово.
Како што објави Анадолија, а пренесе Н1, Курти изјавил дека пристапот кон процесот на нормализација на односите мора да биде избалансиран, со почитување и целосно спроведување на Основниот договор од Брисел и неговиот анекс договорен во Скопје.
– Србија да се откаже од јавното и фактичкото отфрлање на деловите од Основниот договор кои се однесуваат на де факто признавањето на Косово и нашиот територијален интегритет – рече Курти.
Премиерката на Србија, Ана Брнабиќ изјави дека се сеќава на последниот самит на Берлинскиот процес затоа што тогаш започна кризата на северот на Косово, а „се тргна надолу“, бидејќи Курти тогаш го разреши директорот на полицијата за северниот регион.