Тројца полицајци заработија кривична пријава поради тоа што пуштиле на слобода осуденик затоа што немало место во битолскиот затвор.
Како што информираат од МВР, полицајците Т.Л., И.Д. и Р.Т., на 02/03. јуни годинава прво и второ пријавениот не постапиле по писмена наредба на Основен суд Кичево за спроведување на осудено лице во казнено поправна установа заради извршување на санкција утврдена со правосилна пресуда, заради издржување на казна затвор во времетраење од една година.
„Имено, откако претходно бил пронајден и лишен од слобода, осудениот А.А. од Кичево, од страна на прво и второ пријавениот бил спроведен до КПУ Затвор Битола, а откако од страна на вработен во затворот осудениот наводно не бил примен поради немање на слободни места во затворската установа, прво и второ пријавениот, без да изготват било каква службена документација, го пуштиле осуденото лице на слобода без одобрение на судот, кој ја издал писмената наредба. Наведеното го извршиле со претходно одобрение на третопријавениот во својство на одговорен, кој не издал наредба осуденото лице да биде доведено и задржано во ПС ОН Битола заради понатамошна постапка спротивно на член 15 од Правилникот за вршење на полициските работи“ – информираат од МВР.
Против Т.Л., И.Д., и Р.Т. ќе биде и поднесен предлог за поведување на постапка за утврдување на дисциплинска одговорност против полициските службеници и ќе изрече задолжителни мерки за отстранување од работното место до завршување на дисциплинската постапка.