Кочанчани со молба: Денес Македонијо тагувај, ова не е приказна за кликови, ова е човечка болка!

Денес е најтажниот ден во историјата на Македонија. Денес е најцрниот и најболен ден каде се погребаат 59 млади лица кои загинаа во страшната несреќа во пожарот во дискотеката Пулс.

Граѓаните на Кочани денеска објавија и апел во кој бараат новинарите и медиумските куќи да не прават настани за гледаност.

Како што велат, ова не е приказна за кликови, ова е човечка болка.

„Како да напишеме, како да објасниме, како да ве замолиме? Дали и по оваа трагедија повторно треба да клекнеме на колена? Веќе сме клекнати… од болка, од тага, од немоќ. Почитувани новинари, медиуми, Не правете настан за гледаност од ова. Веќе кружат видеа од пред куќите на починатите, од нивните пријатели што со солзи ги подготвуваат за последното збогум. Ова не е приказна за кликови, ова е човечка болка. Почитувани граѓани, на ова тажно парче земја ве молиме, не ги споделувајте нивните видеа. Покажете револт, игнорирајте ги текстовите што ја претвораат трагедијата во сензација. Така ќе покажеме почит кон загинатите, кон нивните семејства, кон нашиот град. Молете се. Нека ни даде Господ сила на сите“, велат граѓаните на Кочани.

Тие додаваат дека ова е ден на болка, ден на тишина, ден кога срцата се скршени, а солзите не престануваат да течат.

„Кочани остана без дел од својата младост, без својата иднина, без својата душа. Ова мало градче денеска тажи, секој граѓанин носи неизмерна болка. Нема човек што не загуби роднина, пријател, колега, другар, брат, сестра, син, ќерка. Болката е премногу голема за да се опише со зборови, а тагата предлабока за да може да се издржи. Ова не е само трагедија на едно семејство, ова е загуба за целиот град, за целата земја. Во овие моменти на жалост и тешка болка, апелираме покажете почит. Не објавувајте видеа, не споделувајте фотографии, не користете сензационални наслови. Болката на семејствата е доволно голема не ја зголемувајте со непромислени објави. Ова не е време за вести, ова не е време за љубопитност. Ова е време за тишина, за молитва, за достоинствено збогување.

Денес, Македонијо, тагувај со Кочани. Моли се за сила на родителите, на семејствата, на сите што загубија најмили. Да ги испратиме нашите деца во мир и достоинство. Поштедете не од сензационални наслови денес, тагата зборува сама.

Почивајте во мир, наши млади ангели. Простете ни што не ве зачувавме. Вашата светлина никогаш нема да згасне, вашите насмевки ќе останат во нашите срца. Ќе живеете вечно во сеќавањата на секој од нас“, велат граѓаните на Кочани.