Ковачевски: Го намаливме ДДВ-то за струјата од 18% на 5%, следува нов пакет мерки за заштита на граѓаните

„Мерки за ублажување на последиците од глобалното покачување на електричната енергија започнаа уште минатата година преку намалување на ДДВ за електрична енергија од 18 на 5 отсто, а во периодот што следи ќе следуваат нов пакет мерки за заштита на животниот стандард на граѓаните“. Ова меѓудругото вечерва го соопшти претседателот на СДСМ и мандатар – Димитар Ковачевски на тв Телма.

„Министерството за финансии, каде јас бев директно вклучен, веќе на првите знаци на покачувањето на цената на енергенсите, веднаш интервениравме со намалување на стапката на ДДВ за електрична енергија за домаќинствата и за малите потрошувачи од 18 на 5 проценти. И кога видовме дека цената на електричната енергија не застанува, туку напротив расне, тогаш веќе почнавме со обезбедување ликвидни средства и со давање наредби до сите производствени капацитети да бидат пуштени во погон со цел да се обезбеди електрична енергија од домашно произвидство“ – рече Ковачевски.

Тој смета дека реакцијата на Владата беше брза и навремена. Ковачевски нагласи дека сите одлуки ги носеле заедно со министерот за еконимија, Фатмир Бесими врз основа на анализи кои се однесуваат на краткорочно и среднорочно движење, на факторите кои влијаат на одредени даноци.

„Ова не беа единствени даночни олеснувања во однос на електричната енергија кои беа донесени. Ние носевме даночни олеснувања и во однос на занаетчиските услуги, даночни намалувања и во однос на угостителскиот сектор, кога тоа беше потребно“ – рече Ковачевски.

Најави дека работат на сеопфатно решение за заштита на граѓаните од поскапувања, но и за да се обезбеди парно греење во Скопје.