Сите знаеја дека изборите во Русија се „завршена работа“ и дека Владимир Путин ќе остане претседател. Дали сепак ќе има промени во државата?
Руските претседателски избори, како и „рекордно добрите резултати“ и прогласувањето на Владимир Путин за победник, однапред беа гледани како обична формалност во светот, а делумно и во самата Русија. Како ќе се развива ситуацијата во таа земја сега, по изборите?, анализира Дојче веле (ДВ).
Стабилизација на режимот на Путин
„Прогласените 87 отсто од освоените гласови го потврдуваат режимот и се поавторитарниот курс на Владимир Путин. Резултатот од изборите во Русија, сепак, не ја одразува волјата на гласачите, туку волјата на режимот“, вели Регина Хелер од Институтот за истражување на мирот и безбедносната политика на Универзитетот во Хамбург. Ова, вели таа, е еден вид „лиценца за режимот, за политиката на Путин и неговите постапки во Украина“.
Експертот за Источна Европа, Ханс-Хенинг Шредер, смета дека режимот на Путин успеал да ја стабилизира владата, откако минатата година западна во криза поради бунтот на групата Вагнер и нејзиниот водач, олигархот Евгениј Пригожин, кој подоцна почина во авионска несреќа. Кремљ на тие настани одговори со зголемената јавна активност на Путин, што требаше да ја пренесе пораката дека тој „ја има ситуацијата под контрола“.
Германските експерти укажуваат дека режимот продолжува да опстојува благодарение на факторите како што се стабилната економска ситуација и успехот во ублажувањето на негативните последици од западните санкции. На тоа, велат тие, треба да се додаде и масовна репресија врз противниците на руската војна против Украина. Сето ова му овозможува на Кремљ да продолжи како што беше досега, дури и по изборите. „Веќе сега можеме да видиме дека Путин ќе продолжи со воениот курс, дека ќе продолжи да ја води војната со несмалена жестокост, а можеби дури и да ја ескалира уште повеќе“, вели Регина Хелер.
Зголемување на даноците за финансирање војна?
Експертите очекуваат и зголемување на даноците во Русија, имајќи предвид дека самиот Путин уште пред изборите во говорот пред рускиот парламент ја повика владата да го реформира даночното законодавство. Војната има своја цена – така гледа Ханс-Хенинг Шредер.
„На владата и требаат пари, и требаат повеќе приходи, а тоа може да се постигне само преку зголемени даноци. А приходите од тој зголемен данок, се разбира, треба да одат најмногу за војна“, вели Герхард Мангот, професор по политички науки на Универзитетот во Инсбрук кој е специјализиран за меѓународна политика и безбедност во постсоцијалистичкиот простор.
Понатамошна мобилизација во Русија?
Во меѓувреме, во Русија се зборува за нова мобилизација во пошироките кругови на населението. Многу луѓе мислат дека тоа е веројатно, бидејќи Путин не ја омекнува реториката на војната, вели Регина Хелер. „Гледаме дека западната поддршка за Украина не е толку силна како што треба“, вели научникот од Хамбург и укажува дека тоа може да значи за Кремљ дека сега е поволен момент да се обиде да го промени балансот на силите во корист на Русија.
Од друга страна, вели Хелер, мобилизацијата може да биде опасна, бидејќи руското население е многу уморно од војната. Затоа Герхард Мангот, повикувајќи се на резултатите од истражувањето на јавното мислење, смета дека е помала веројатноста повторно да се изврши масовна мобилизација.
Одлуката дали ќе има мобилизација во блиска иднина или не зависи од тоа што планираат Русите во наредните месеци во Украина, вели Ханс-Хенинг Шредер. „Ако сакаат да започнат офанзива и навистина да ја поразат Украина, за тоа треба значително да ги зголемат своите сили – не само за воена победа, туку и за да ја задржат Украина под контрола.
Сепак, Шредер додава: „Мој впечаток е дека целта, барем до изборите во САД, е да се задржи предноста и генерално да се создаде впечаток дома и во странство дека Русија е на пат кон победата. Доколку Бајден загуби, а Трамп е избран за претседател на САД, ситуацијата би се променила во голема мера и би била многу полоша за Украина. „Тогаш“, вели Шредер, „мобилизацијата во Русија веројатно нема да биде потребна“.
Реструктуирање на врвот?
Во секој случај, експертите не очекуваат значителни промени во руското раководство. „Не гледам некои големи слабости во моментов“, вели Шредер. Според Кремљ, премиерот Михаил Мишустин добро си ја врши работата. Централната банка и финансиските експерти ја стабилизираа ситуацијата во Русија по очигледно потценетите реакции на ЕУ и САД за нападот врз Украина. Под контрола е и инфлацијата, а функционира стратегијата за преориентирање на целата економија од Европа во Азија. „Затоа Путин не гледа причина за промена“, вели Шредер.
Регина Хелер потсетува дека Путин во своето обраќање за состојбата на нацијата изјави дека на Русија и треба нова елита, лојална на војната. Според неа, тоа би можело да се однесува на „црвените принцови“, како што вели германскиот стручњак. Таа го користи терминот за да ги опише децата на соработниците на Путин, оние кои Путин ги познава одамна и кои му се целосно лојални. Хелер смета дека веројатно ќе има промени во владејачката руска елита со долгорочни последици – се со цел да се подготви контролиран трансфер на власта и власта по Путин. Ова ќе обезбеди континуитет на неговиот систем.