Италијански суд го запре проектот за мост што требаше да ја поврзе Сицилија со копното

Ревизорскиот суд на Италија вчера одби да одобри еден од клучните планови на владата на премиерката Џорџа Мелони – за изградба на масивен мост вреден 13,5 милијарди евра што треба да ја поврзе Сицилија со копното.

Изградбата на мостот преку Месинскиот теснец е одобрена и откажана неколку пати откако италијанската Влада првпат објави повик за предлози во 1969 година.

Администрацијата на Џорџа Мелони го обнови планот во 2023 година, и ова е најдалечната точка до која стигна амбициозниот проект – првпат замислен од античките Римјани.

Ревизорскиот суд – што има двојна улога на финансиска контрола и надлежност за јавно сметководство – ја објави својата одлука во кратка изјава синоќа, нанесувајќи им тежок удар на Мелони и нејзината десничарска влада.

Судот објави дека ќе го објави образложението на одлуката во рок од 30 дена, а Мелони веднаш ја осуди пресудата, нарекувајќи ја „недозволиво мешање“ од страна на судиите.

Таа, исто така, вети дека владата ќе продолжи со проектот.

Министерот за транспорт и вицепремиер Матео Салвини, главен спонзор на проектот за мостот, ја осуди пресудата како „политичка одлука“ и вети дека ќе бара сите можни начини за спроведување на планот.

Одлуката на Ревизорскиот суд не го блокира проектот дефинитивно, но може за долго време да го одложи неговото конечно одобрување.

Проектот отсекогаш бил предмет на широка дебата поради неговиот обем, подложноста на закани од земјотреси, влијанието врз животната средина и можноста за инволвирање на мафијата.

Прелиминарните работи се очекуваа да започнат оваа есен, а изградбата да започне следната година.

И покрај бирократските одложувања, според планот на владата се очекуваше мостот да биде завршен помеѓу 2032 и 2033 година.

Мостот над Месинскиот Проток би бил долг речиси 3,7 километри.