Портпаролот на Белата куќа Џон Кирби изјави дека Израел ќе ги прекинува борбите по четири часа дневно во северниот дел на Газа, секој ден.
Израел се согласи да воведе четиричасовни дневни хуманитарни паузи во нападите врз Хамас во северниот дел на Газа почнувајќи од четврток, соопшти Белата куќа, додека претседателот Џо Бајден ги притиска Израелците за повеќедневен прекин на борбите во обид да ги ослободи заложниците што ги држи милитантната група, пренесе Асошиејтед прес.
Израелската армија претходно најави „тактички и локални паузи“.
Портпаролот на Советот за национална безбедност Џон Кирби рече дека првата дневна хуманитарна пауза ќе биде објавена денеска и дека Израелците се обврзале да ја објавуваат секоја пауза од четири часа најмалку три часа однапред. Израел, рече тој, отвора и втор коридор за цивилите да ги напуштат областите што се во моменталниот фокус на неговата воена кампања против Хамас, со крајбрежен пат што се приклучува на главниот автопат север-југ на територијата.