Израел пресретна ракета од Јемен по воздушни напади врз Хутите

Израелската армија денеска соопшти дека пресретнала ракета испукана од територијата на Јемен, еден ден откако израелски сили извршија воздушни напади врз пристаниште под контрола на ирански поддржаната група Хути.

„По вклучувањето на сирените во неколку израелски реони, пресретната е ракета испукана од Јемен“, соопшти армијата на Израел преку својот канал на Телеграм.

Портпаролот на Хутите, Јахја Сари, потврди дека бунтовниците нападнале аеродромот Бен Гурион во близина на Тел Авив со хиперсонична балистичка ракета. Претходно најави и напад со дронови врз истиот аеродром и други цели во Израел.

Хутите, кои ја контролираат јеменската престолнина Сана и големи делови од земјата, редовно испукуваат ракети кон Израел од почетокот на војната во Газа во октомври 2023. Најголемиот дел од проектилите се пресретнуваат пред да навлезат во израелскиот воздушен простор.

Во знак на поддршка на Палестинците, Хутите напаѓаат и бродови кои ги сметаат за поврзани со Израел. Израел, пак, редовно возвраќа со бомбардирања на инфраструктурата што ја контролираат бунтовниците, особено пристаништето Ходеида.

Израелскиот министер за одбрана Јоав Галант вчера изјави дека нападите биле насочени кон „терористички цели“ на Хутите во едно од најважните пристаништа на Јемен, на брегот од Црвеното Море.

„Јасно ставив до знаење дека судбината на Јемен ќе биде иста како на Техеран“, порача Галант, алудирајќи на 12-дневната војна што започна со израелскиот напад врз Иран на 13 јуни.

Изјавата предизвика загриженост од ескалација на нападите врз Јемен – најсиромашната земја на Арапскиот Полуостров. Според изјава на претставник на Хутите, вчерашните напади го уништиле „веќе обновениот дел од пристанишниот кеј“.