Израел повторно нападна цели во близина на Дамаск, Турција остро реагира

Израелските воздухопловни сили синоќа извршија два воздушни напада врз воени објекти во близина на сирискиот главен град Дамаск, соопшти Сирискиот центар за набљудување на човековите права.

„Израелски авиони гаѓаа воени позиции и пунктови на периферијата на Дамаск“, соопшти Центарот, додавајќи дека засега нема информации за евентуални жртви.

Овие напади уследија помалку од 24 часа по слични израелски напади врз сириски воени цели, како и копнена офанзива во јужниот дел на Сирија, при што, според Центарот, загинале 13 лица.

Израел ги засили воздушните напади во Сирија, тврдејќи дека тие се предупредување до новите исламистички власти во Дамаск, а ја обвини и Турција – нивниот сојузник – дека се обидува да ја претвори Сирија во турски протекторат.

Турција возврати, повикувајќи на итно повлекување на Израел од Сирија и обвинувајќи го за попречување на напорите за стабилизација.

„Израел стана најголема закана за регионалната безбедност“ и претставува „стратегиски дестабилизирачки фактор кој предизвикува хаос и поттикнува тероризам“, соопшти турското Министерство за надворешни работи.

„Затоа, за да се воспостави безбедност во регионот, Израел најпрво мора да се откаже од својата експанзионистичка политика, да се повлече од окупираните територии и да престане да ги поткопува напорите за стабилност во Сирија“, се додава во соопштението.