Зеленски: Чекаме одговор од САД за следната рунда мировни преговори со Русија

Украинскиот претседател Володимир Зеленски изјави дека е подготвен за следната рунда трилатерални мировни преговори за завршување на војната со Русија, но дека од Вашингтон и Москва зависи да се договорат каде и кога ќе се сретнат, беше објавено денес.

Зеленски рече дека САД предложиле да бидат домаќини на следната средба, на која ќе учествуваат американските претставници Стив Виткоф и Џаред Кушнер, но дека Москва одбила да испрати делегација.

„Чекаме одговор од Американците. Или ќе ја променат земјата каде што се среќаваме, или Русите ќе ги прифатат САД. Ние не блокираме ниту една од овие иницијативи. Сакаме да се одржи трилатералната средба“, изјави вчера Зеленски за новинарите.

САД претходно ги одложија своите преговори со Русија и Украина поради војната на Блискиот Исток.

Зеленски, исто така, предупреди на многу висок ризик дека војната во Иран би можела да ги исцрпи резервите за воздушна одбрана што Украина ги користи за да се одбрани од руските ракетни напади.

Тој рече дека нема јасна слика за достапните залихи и дека разговарал со францускиот претседател Емануел Макрон во Париз во петокот дали системите SAMP/T би можеле да послужат како алтернатива на американските батерии „Патриот“ за пресретнување на балистички ракети.

Зеленски додаде дека Украина ќе биде „прва на ред“ за тестирање на која било одржлива алтернатива.

Зеленски рече дека Вашингтон неколку пати се обратил до Украина барајќи помош за одредена земја или поддршка за Американците, без да прецизира конкретни детали.

Тој рече дека барањата стигнале од разни американски воени институции упатени до Министерството за одбрана на Украина и други воени лидери.

„Сите наши институции ги примија овие барања и ние одговоривме на нив“, рече Зеленски.