Украинскиот претседател Володимир Зеленски во интервју за Франс прес изјави дека ја отфрла идејата за примирје во војната со Русија за време на Олимписките игри во Париз, за што францускиот претседател Емануел Макрон изрази желба.
„Реков: Емануел, ние не веруваме во тоа. Ајде за момент да замислиме дека има примирје. Прво, не му веруваме на Путин. Второ, тој нема да ги повлече своите војници. Трето, кажи ми, Емануел, реков, кој гарантира дека Русија нема да го искористи ова за да ги донесе своите трупи на наша територија“, рече Зеленски.
„Ние не сме против примирје, ние не сме против крајот на војната. Но, сакаме праведен крај на оваа војна. Ние сме против примирје што ќе му користи на непријателот“, додаде тој.
Неколку часа претходно, рускиот претседател, кој отпатува за Кина, имплицираше дека се противи на олимпиското примирје бидејќи на неговата земја и беше забрането учество на Олимпијадата поради инвазијата на Украина.
Макрон рече дека сака да „направи се“ за да владее олимписко примирје низ светот за време на Олимписките игри. Тој рече дека претседателот Си Џинпинг му дал поддршка на почетокот на мај.
Се знае дека Си и Путин, кои се сретнаа во Пекинг во четвртокот, не разговарале на оваа тема.
Во интервју за АФП, Зеленски исто така рече дека Русија нема средства да изврши нов голем напад врз Киев.
„Тие немаат сила за голема офанзива против главниот град, како што имаа на почетокот на инвазијата“, рече Зеленски, кој верува дека Донбас на исток и Харков на североисток се главните цели на Кремљ.
Украинскиот претседател, исто така, нагласи дека неговата земја има само една четвртина од системите за противвоздушна одбрана што и се потребни и потребни се уште 120 до 130 борбени авиони Ф-16 за да ја одземе доминацијата од Русија во воздухот.