За кредитот од Унгарија ќе плаќаме провизија за правни услуги на приватна фирма избрана од унгарската банка

Предлог-законот за задолжување на Македонија кај Унгарската експорт-импорт банка за износ од 500 милиони евра стигна во Собранието, а Владата бара овој акт да се носи по скратена постапка.

Според текстот на договорот, Македонија ќе мора да плати провизија за правни услуги на независна фирма, избрана од Унгарската банка.

Оваа провизија ќе се исплати пред повлекување на првата транша од заемот.

Овој услов за плаќање на провизијата предизвика загриженост бидејќи правната фирма ќе биде избрана од унгарската страна, што ја отвора вратата за прашања околу можната корупција и нетранспарентност во процесот.

Иако износот на оваа провизија не е јавно објавен, факт е дека овој дополнителен трошок ќе ја зголеми вкупната финансиска обврска за земјата, покрај каматната стапка од 3,25% и провизијата за неповлечените средства.

Заемот ќе се повлече во една транша, а отплатата ќе се врши на 24 полугодишни рати.

Дополнителен услов во договорот е плаќањето на провизија од 0,5% за неповлечениот дел од средствата, што ќе се пресметува на дневна основа, започнувајќи од датумот кога средствата ќе бидат достапни.

Ова значи дека ако С. Македонија не ги повлече сите средства одеднаш, дополнителни трошоци ќе се акумулираат.

Придружното писмо, испратено од премиерот Мицкоски до парламентот, истакнува дека текстот на законот бил утврден на седницата одржана на 3 септември.

Експертите критикуваат дека постои недостаток на транспарентност во целиот процес и дека ваквите одлуки не треба да се носат на брз начин без широка јавна дебата.