За Ковачевски и Димовски сѐ уште се проверува дали имаат вмешаност во „Лотарија“

Екс премиерот Димитар Ковачевски и поранешниот генерален секретар Методија Димовски не се опфатени со истрагата за „Лотарија“, но кривичната пријава против нив се уште не е отфрлена, информираат од Обвинителството, без да ги посочат имињата на пријавените.

-Јавното обвинителство веќе извести дека кривичната пријава за наведените лица не е отфрлена. Основното јавно обвинителство Скопје во овој предмет постапуваше по поднесени кривични пријави и од Министерството за внатрешни работи и од Управата за финансиска полиција. По сите преземени дејствија од сите надлежни институции во конкретниот случај до овој момент се обезбедија докази кои упатуваат на основано сомнение дека наведените шест лица презеле дејствија со кои исполнуваат обележја на кривичните дела за кои беше поведена постапка. За останатите наводи од пријавите проверките продолжуваат. Напоменуваме двете лица што ги наведувате се пријавени за сосема друг временски период и за други дејствија, а на седницата на 06.06.2023 година кога точка на дневен ред била наведената одлука претседавал единствено сега осомничениот, информираа од Обвинителството.

Забуната во јавноста настана поради тоа што Ковачевски и Димовски биле опфатени со кривичната пријава на МВР, каде што се пријавени вкупно 8 лица, но од скопското обвинителство информираа дека истрагата е отворена за шестмина. Ова значи дека проверките за Ковачевски и Димовски продолжуваат.

Извор: Фокус