Жозе Мурињо веќе не е тренер на Фенербахче

Турскиот фудбалски клуб Фенербахче соопшти дека се разделува со Жозе Мурињо, отказот за Португалецот следува по поразот од Бенфика по кој турскиот тим не успеа да влезе во групната фаза од Лигата на шампионите.

Мурињо во последно време постојано го критикуваше раководството на Фенербахче поради тоа што не му донесе соодветни засилувања.

Португалецот велеше дека клубот се однесува како да не сака да игра во Лигата на шампионите.

Неговиот однос кон раководството заедно со елиминацијата во плејофот од Бенфика беше одлучувачки за отказот.

„Се разделивме со Жозе Мурињо кој беше тренер на нашиот тим од сезоната 2024-25. Му благодариме за работата во нашиот тим и му посакуваме успех во иднина“, стои во соопштението на Фенербахче.