Грчката полиција извести дека решила неверојатен случај од Триполи на Пелопонез, каде 44-годишна жена била обвинета дека подметнала неколку пожари, а во своја одбрана тврдела дека тоа го направила бидејќи уживала да ги гледа и да флертува со пожарникарите.
За своите постапки таа доби 36 месеци затвор и парична казна од 1.000 евра. Гркинката предизвикала два пожари на земјоделско земјиште, но за среќа не е причинета поголема штета бидејќи и двата брзо биле изгаснати.
Според грчките медиуми, 44-годишната жена станала главен осомничен кога пожарникарите забележале дека е присутна на двете жаришта, пишува Грик Репортер. Таа признала дека сакала да запознае маж во униформа.
Во Грција неодамна беше уапсен 51-годишен маж, кој е осомничен дека во периодот од 24 до 25 август во Драма предизвикал три пожари на земјоделско земјиште.
Тој е осуден на парична казна од 1.550 евра и 15 месеци затвор. Имено, според новиот грчки закон, случајното палење е кривично дело, а казните се строги.