ЕУ им нуди на Украинците договор за минералните суровини, поинаков од оној на Трамп

Европската унија ѝ понуди на Украина сопствен договор за „критичните суровини“ синоќа, токму во моментот кога американскиот претседател Доналд Трамп изјави дека Вашингтон е блиску до постигнување договор со Киев за правата на огромните природни ресурси на Украина, пишува Politico.

Еврокомесарот за индустриска стратегија Стефан Сежурне рече дека ја претставил европската верзија на договорот на Украина за време на посетата на Киев, каде делегација на Европската комисија ја одбележа третата годишнина од почетокот на сеопфатната руска инвазија.

„Дваесет и еден од 30-те критични материјали што и се потребни на Европа може да ги обезбеди Украина, во заемно корисно партнерство“, рече Сежурне, пренесе АФП. Тој, исто така, ја истакна клучната разлика меѓу ЕУ и САД: „Додадената вредност што ја нуди Европа е тоа што никогаш нема да бараме договор што не е заемно корисен“.

Трамп е сè поагресивен во своите барања кон Украина кога станува збор за нејзините природни ресурси. Тој бара дури 500 милијарди долари компензација за американската помош за Киев во одбрана од рускиот напад.

Украинскиот претседател Володимир Зеленски досега одби да потпише два нацрт-договори предложени од администрацијата на Трамп. Според Њујорк Тајмс, овие договори вклучувале откажување од Украина од правата на минералните ресурси, приходите од нафта и гас и профит од пристаништата и инфраструктурата во вредност од 500 милијарди долари.

„Нема да потпишам нешто за што десет генерации Украинци ќе мора да платат“, рече Зеленски на прес-конференција во неделата. Но, Трамп вчера рече дека „конечниот договор е многу блиску“ и дека ќе вклучува „ретки метали и разни други работи“.

И украинската вицепремиерка Олха Стефанишина рече дека Украина и Соединетите Држави се во „последна фаза“ од преговорите за договор со кој Вашингтон би добил пристап до украинските минерални ресурси во замена за безбедносни гаранции. ,

Украина има огромни резерви на клучни суровини, од литиум до титаниум, кои се од суштинско значење за модерната технологија и се во голема побарувачка во глобалната трка по ресурси. Има и големи резерви на јаглен, нафта, гас и ураниум, но значителен дел од овие ресурси се наоѓаат на територија под руска контрола.