Ескобар: Исходот од дијалогот меѓу Косово и Србија е се уште далеку

Претставникот на САД, Габриел Ескобар изјави дека исходот од дијалогот меѓу Косово и Србија е се уште далеку и дека треба многу да се работи пред да се постигне договор меѓу двете страни.

По средбата меѓу косовскиот премиер Албин Курти и претседателот на Србија, Александар Вучиќ, тој за ТВ Канал 10 изјави дека денеска ќе ги изнесе деталите од средбата во Брисел и донесените заклучоци, одбивајќи да зборува конкретно за детали.

Ескобар вчера имаше одвоени средби со Курти и Вучиќ и со нив разговараше за постигнување договор за нормализација на односите меѓу Косово и Србија.

Шефот на европската дипломатија, Жозеп Борел, по средбата со претседателот на Србија и со премиерот на Косово, изјави дека Вучиќ и Курти се согласиле дека не се потребни нови разговори за предлогот на Европската унија.

Косовскиот премиер по вчерашните средби изјави дека е подготвен да го потпише договорот, но дека другата страна одбила.

Вучиќ, пак, рече дека темата на средбата не бил европскиот предлог, туку планот за имплементација и исполнувањето на претходно потпишаните договори.

Вучиќ најави дека разговорите меѓу Белград и Приштина ќе продолжат. Двете страни ќе разговараат со специјалниот претставник на ЕУ за дијалог, Мирослав Лајчак, како дел од подготовките за следната средба, која треба да се одржи на 18 март, на територијата на Северна Македонија, каде потоа ќе престојува Борел.

Претседателот на Србија рече и дека во ЕУ до 23 и 24 март, кога се одржува Европскиот совет, имаат извештај за агендата дали Белград и Приштина постигнале нешто и соодветно ќе ја третираат европската интеграција на двете страни.