ЕК ги отфрли заканите на Трамп во врска со регулирањето на технолошките компании

Суверено право на ЕУ и нејзините земји-членки е да ги регулираат економските активности на нивна територија, одговори Европската комисија на заканите на американскиот претседател Доналд Трамп за воведување тарифи за сите земји што ги регулирале активностите на американските технолошки компании.

Суверено право на Европската унија и нејзините земји-членки е да ги регулираат економските активности на нивна територија во согласност со нашите демократски вредности, изјави портпаролката на Комисијата, Паула Пињо, на прес-конференција во вторник.

Преку својата социјална мрежа Truth Social, Трамп им се закани на сите земји што воведоа дигитални даноци, закони, правила и прописи за активностите на технолошките компании дека ќе воведат дополнителни тарифи доколку не ги укинат овие дискриминаторски мерки.

Европската комисија повторува дека регулативите на ЕУ за дигитални услуги и дигитални пазари не се дел од рамковниот договор што беше договорен на крајот на минатиот месец од претседателката на Комисијата, Урсула фон дер Лајен, и американскиот претседател Доналд Трамп. Со тој договор, Комисијата се согласи на тарифи од 15 проценти за европските стоки што се извезуваат во САД.

Законот за дигитални услуги (DSA) и Законот за дигитални пазари (DMA) се два регулативи на ЕУ што ја регулираат дигиталната средина. DSA се фокусира на заштита на корисниците од нелегална содржина и промовирање на транспарентност, додека DMA се фокусира на воведување конкуренција и спречување на злоупотреба на доминантната позиција на големите дигитални платформи на единствениот пазар.

Американската страна постојано нагласува дека овие регулативи претставуваат нецарински бариери за американските технолошки компании и дека воспоставуваат цензура врз слободата на изразување.

Портпаролката на Комисијата вели дека овие закони со право не се дел од царинскиот договор. Ова се одделни прашања, а тврдењата за цензура се целосно неосновани, рече Пињо.