Европските аеродроми предупредуваат дека ќе се соочат со недостиг на гориво за авиони

Европските аеродроми ќе се соочат со „системски“ недостиг на гориво за авиони доколку Ормускиот Теснец не биде целосно отворен во рок од три недели, предупреди организацијата „АЦИ Европа“.

„АЦИ Европа“, која ги претставува аеродромите на ЕУ, изјави дека резервите на гориво за авиони се намалуваат, додека влијанието на воената активност врз побарувачката дополнително ги оптоварува залихите.

Во писмо до кое увид имал „Фајненшл тајмс“, организацијата го предупредила комесарот за транспорт на ЕУ, Апостолос Цицикостас, за „зголемената загриженост на аеродромската индустрија во врска со достапноста на гориво за авиони, како и за потребата од проактивно следење и дејствување на ЕУ“.

„Доколку преминот низ Ормускиот Теснец во следните три недели не продолжи на стабилен начин, системскиот недостиг на гориво за авиони ќе стане реалност за ЕУ“, стои во писмото.

Притоа, се додава дека приближувањето на врвот на летната сезона „кога воздушниот сообраќај го овозможува целиот туристички екосистем од кој зависат многу економии на ЕУ“ ги интензивирало овие загрижености.