ДУИ објави имиња на кандидати за градоначалници во Кичево, Липково, Чашка, Студеничани и Брвеница
Потпретседателот на партијата, Арбер Адеми, најави дека Централното претседателство допрва ќе одлучува кои ќе бидат кандидатите за градоначалник на Град Скопје, Општина Боговиње, Општина Долнени, како и на Општина Пласница. Веќе се објавени кандидатите за Чаир, Тетово и Желино.
Опозициската Демократска унија за интеграција (ДУИ), по денешната седница на Централното претседателство, објави уште неколку имиња на кандидати за градоначалници во општините во кои ќе учествува на претстојните локални избори што треба да се одржат во октомври.
Потпретседателот на партијата, Арбер Адеми, соопшти дека ќе го кандидираат Фатмир Дехари за уште еден градоначалнички мандат во Кичево. Еркан Арифи, пак, ќе бара доверба од граѓаните на Липково, исто така, за уште еден мандат. Кандидат за градоначалник на Општина Чашка е Суат Шаќири, а за Општина Студеничани – Ејуп Абази.
Централното претседателство на ДУИ одлучило да ја поддржи и независната кандидатура на Енвер Пајазити за градоначалник на Општина Брвеница.
Адеми најави дека Централното претседателство на партијата допрва ќе одлучува кои ќе бидат кандидатите за градоначалник на Град Скопје, Општина Боговиње, Општина Долнени, како и на Општина Пласница.
Претходно, ДУИ објави дека кандидат за градоначалник на Општина Чаир ќе им биде Бујар Османи, за Општина Тетово – Бајрам Реџепи, а во Општина Желино – Емир Сулејмани.