ДУИ: Дали почна да се реализира договорот Мицкоски-Заев; маргинализација на Албанците во замена за амнестија, посредуван од Кочо Ангушев?

Однесувањето на СДСМ денес изгледа како сè, само не како опозициска партија на ВМРО-ДПМНЕ, велат од ДУИ.

„Наместо да се бори против актуелната власт, СДСМ се однесува како „заробена“ партија, која не се осмелува вистински да ја предизвика Владата, туку само ја легитимира со своето молчење и согласност.

Оваа трансформација не е случајна. Необјавениот договор меѓу Мицкоски и Заев, со посредство на олигархот Ангушев, има јасна цел: да обезбеди имунитет, во замена за власт што ќе го елиминира политичкото влијание на Албанците. Зарем не е токму ова причината зошто СДСМ не се спротивставува на засилувањето на елементите на „српскиот свет“ во Македонија?

Зошто не реагира на политиките што имаат за цел да ја намалат политичката и економската улога на Албанците?
Зошто нема никаква критика за прекршувањето на етничкиот баланс, исклучувањето на Албанците од институциите и уривањето на механизмите на претставување?“ прашуваат од ДУИ.

Од партијата посочуваат дека СДСМ веќе не е опозиција, туку, како што велат, тивок гарант на проект што им служи само на две групи: на ВМРО-ДПМНЕ и на оние што сакаат да го вратат назад процесот на политичка и економска еднаквост на Албанците.

„Но, СДСМ не може да избега од својата историска одговорност. Како партија што тврди дека е левичарска, мора да се врати на својот идеолошки идентитет и да ги брани принципите врз кои е изградена: граѓанска еднаквост, правична застапеност, еднакви можности и општествен напредок. Молкот и покорноста пред националистичките агенди не е патот на СДСМ – тоа е патот кон нејзината конечна пропаст.

Албанците нема да дозволат да бидат жртвувани во тајните политички зделки. А ниту македонските граѓани што веруваат во еднаквост и правда не треба да го дозволат тоа. Оние што денес молчат пред овa опасно сценарио, утре ќе сносат одговорност за неговите последици“ порачаа од партијата на Ахмети.