Додик се обиде да организира меѓупартиски преговори во Добој, никој не му дојде

Денешниот обид на лидерот на босанските Срби, Милорад Додик, да организира средба со претставници на парламентарните партии во БиХ и на тој начин да се претстави како неопходен партнер во функционирањето на државата, не успеа, бидејќи никој не се јави на неговата покана освен двајца политичари за кои, како него, има распишани потерници.

Додик, на крајот од минатата недела ги покани претставниците на партиите застапени во Парламентот на БиХ на состанок во Добој, но таму во закажаното време пристигнаа само претседателот на Парламентот на РС, Ненад Стевандиќ, и ентитетскиот премиер Радован Вишковиќ, што потврди дека тројцата бегалци од судството се изолирани и оставени сами да се грижат за себе.

ХДЗ БиХ воопшто не реагираше на повикот на Додик, а партиите со бошњачки предзнак го отфрлија тој повик претходно, како и сите опозициски партии од Република Српска.

Претседателот на СДП на Босна и Херцеговина и премиер на Федерацијата Босна и Херцеговина, Нермин Никшиќ, му рече на Додик дека може да разговара само со судии и обвинители.

Кон средината на март Судот на Босна и Херцеговина им одреди притвор на Додик, Стевандиќ и Вишковиќ и издаде потерница по нив, како дел од истрагата во која сите тројца се осомничени за напад врз уставниот поредок и одбија да одговорат на поканата на Обвинителството на Босна и Херцеговина за сослушување.

Додик, Стевандиќ и Вишковиќ, видливо разочарани од неуспешната средба, пред новинарите изјавија дека сакаат да понудат соработка за излез од кризата.

-Не успеавме, но не ни е жал што не успеавме, рече Додик, кој повторно го обвини високиот претставник Кристијан Шмит за кризата во Босна и Херцеговина, барајќи сите негови одлуки да бидат поништени со цел да се стабилизира ситуацијата.

Тој тврди дека нема безбедносна закана во БиХ и ги обвини Бошњаците за постојани обиди да добијат мнозинство, па затоа се обиде да се претстави како заштитник на Хрватите.

-Веруваме дека двата народа, Србите и Хрватите, се чувствуваат сè повеќе понижени и угнетени во Босна и Херцеговина, рече тој.

Минатата недела, десет политички партии претставени во парламентот на БиХ потпишаа платформа за соработка што би подразбирала исклучување на партијата на Додик од владејачката коалиција, но тој проект сè уште зависи од тоа дали ХДЗ БиХ ќе ѝ се придружи.

Лидерот на оваа партија, Драган Човиќ, како услов за формирање нова коалиција, постави измени во Изборниот закон што ќе им обезбедат на Хрватите можност сами да го изберат својот член на Претседателството на БиХ.

Владата во БиХ е блокирана со месеци откако коалицијата на бошњачките партии, ХДЗ и СНСД на Додик, практично се распадна.