„Заедно со коалициските партнери во вторник во 18 часот ќе одржиме состанок во Бања Лука со цел да кажеме дека нема да дозволиме да се урне изборната волја на народот на Република Српска“, изјави претседателот на СНСД, Милорад Додик.
Додик најави контра средба, бидејќи неодамна лидерите на опозицијата во РС имаа и две средби на кои побараа ново пребројување на гласовите за потпретседателот и претседателот на РС.
ЦИК го повтори пребројувањето на гласачките ливчиња поради нелогичноста и нарушувањето на изборниот процес. Додик и владејачката коалиција го најавија собирот со цел, како што вели, да се спротивстави на опасните намери на опозицијата и странците.
„Република Српска уште еднаш ќе се спротивстави на опасните намери на странците и опозицијата, кои со помош на незаконски одлуки на ЦИК би создале состојба на хаос и нестабилност во Република Српска. На одржаните избори, српскиот народ јасно го кажа својот став и ја поддржа политиката што јас ја застапувам. Ниту една манипулација не може да ја промени волјата на стотици илјади граѓани кои гласаа за силна и стабилна Република Српска“, рече Додик.
Да потсетиме, Милорад Додик за претседателската функција на РС освои поголем број гласови од неговата противкандидатка Јелена Тривиќ, но Централната изборна комисија, откако беа забележани нерегуларности во изборниот процес, одлучи повторно да ги преброи гласовите.