„Димче“ и „Мицика“ ќе си поднесат кривични пријави еден против друг

Пратеникот и лидер на Левица, Димитар Апасиев, го обвини премиерот Христијан Мицкоски во Собрание за оддавање на службена тајна и попречување на правдата, бидејќи на прес-конференција ја објави лажната лиценца на клубот „Пулс“ во Кочани. Тој најави дека идната недела ќе му поднесе и кривична пријава со очекување и него Панче Тошковски да го приведе и да го „легне“ во полициска станица.

„Миле ми текна и Филипче понудија оставки за бродската несреќа во Охрид и за модуларната болница во Тетово. Ноќта вие сте создале кризен штаб. Кога ве сликаа кај повредените во Вучиќев стил без заштитна опрема, го прекршивте законот. Известување од вас не добивме за кризна состојба. На првата прес конференција ја компромитиравте истрагата со објавување службен документ. Го повредивте и правилото на презумпција на невиност. Бевте обвинител но и бранител на вашиот Папазов… Направивте кривично дело за одавање службена тајна. Вие ја попречивте и правдата. На 18 февруари почнавте постапка за разрешување на јавниот обвинител Љупчо Коцевски, а потоа ова го одложивте, а тоа е нудење или давање корист. Ова е алаш вериш, нема да го обвиниш нашиот, а јас ќе те оставам на функција. До кога ќе ги штитите вашите корумпирани вмровски кадри“, праша Апасиев.

Мицкоски пак место да му одговори рече дека бил конфузен и извади фотографија со објект прашувајќи го – дали знае што е? Притоа, го обвини дека како лидер на Левица купил деловен простор по ниска цена во центарот на Скопје, како и дека сторил кривично дело и ги повика институциите да истражат.

На ова му возврати Апасиев, нарекувајќи го „северномакедонски премиер“ и повикувајќи го веднаш да му поднесе кривична пријава, бидејќи ќе му поднесе и тој за попречување на правдата.

„Политичката партија Левица купила деловен имот од 409 метри квадратни на адвокатската улица зад седиштето на компанијата А1, верувале или не, за цена од 295.000 евра со ДДВ или просечно квадратот на овој објект е 721 евро во центар на Скопје. За какво кривично дело е ова професоре? Сега ќе ви кажам.. Градот Скопје ви пресметал дека ова кривично дело кое го зборувам е еднакво на цена квадрат од 1.150 евра, па сте платиле данок во вредност од 739.285 денари. Ова кривично дело е, некое кривично цело, ќе видиме, ќе се позанимаваат органите. Ова дело е преку Универзална инвестициона банка“, рече Мицкоски.

Потоа му покажа фотографија од „Соравија“.

„Што е заедничко помеѓу овие два објекта? Извршителот Андреја Буневски. Тој е заеднички извршител за двата објекти. За Соравија очигледно не успеа бизнисот и е закажано јавно наддавање и проценета е на 22.4 милиони евра, па имам дилема, дали како што го купивте овој деловен објект, а сте неподмитливи, ќе наддавате и за Соравија од 22.4 милиони евра“, провоцираше Мицкоски.

Апасиев му посочи на Мицкоски дека тоа што не му одговара на пратеничкото прашање и дефокусира, е скокање од тема на тема, „синдром на дива коза“ или народски „дијареја“.

„Синдром на дива коза или дијареја, се вика ова што вие го правите. За се се правите флека, не зборувате за се што сте прашан, туку за други. Ние купивме подрумски простории со приземје, затоа е таа цена. Мене и Заев ова ми го правеше. Да сум имал страв од вакви, немало да се бавам со политика. Уште утре да ми поднесете кривична пријава, како што јас ќе ви поднесам за оддавање на службена тајна. Немојте вие да зборувате за поштеност. Вашите два часовници вредат колку таа зграда“, врати Апасиев, додавајќи дека само сметките за струја во Белата палата на ВМРО-ДПМНЕ вредат 10.000 евра месечно и води партија што е побогата од таа на Ангела Меркел.

Апасиев и Мицкоски се препукуваа и лично, и на обракањето со Димче Апасиев возврати со правото да му се обраќа – со Мицика.

„Почитуван северномакедонски премиер, гледам дека Димче ме викате неколку пати. Димче само мајка ми може да ме вика, така да јас може вас да ве викам Мицика, со оглед дека нема реакција од заменик-претседателот на Собранието, рече Апасиев од собраниската говорница.

Извор: Независен