ДЗС: Просечната нето-плата изнесува 45.943 денари, за 9% повисока од минатата година

Просечната нето плата во Македонија е 45.943 денари, за девет проценти повисока во споредба со истиот месец минатата година.

Најголемо зголемување на просечната месечна нето-плата е забележано во дејностите на здравствена и социјална заштита, каде растот изнесува 13,3 проценти.

Следуваат административните и помошни услужни дејности со 13,2 проценти, како и секторот поврзан со недвижен имот, каде платите се повисоки за 10,9 проценти во однос на октомври минатата година.

„Просечната месечна исплатена нето-плата по вработен, во октомври 2025 година, изнесува 45.943 денари. Во октомври 2025 година, во однос на октомври 2024 година, просечната месечна исплатена нето-плата по вработен е повисока за 9.0 %.

Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Дејности на здравствена и социјална заштита за 13.3 %, Административни и помошни услужни дејности за 13.2 % и Дејности во врска со недвижен имот за 10.9 %.

Зголемување на просечната месечна исплатена нето-плата по вработен, во однос на претходниот месец, е забележано во секторите: Дејности во врска со недвижен имот за 9.5 %, Информации и комуникации за 4.2 % и Административни и помошни услужни дејности за 3.6 %“, стои во соопштението на ДЗС.